कविता :- नववर्षको शुभकामना



उत्साह बोकी नववर्ष आयो
नवीन आशा सबमा पलायो
तमाम पीडा अब होस् सुदूर
हाम्रो यही नै शुभकामना छ ll १ ll

अतीत सम्झे मन हुन्छ भारी
भो स्वार्थको मात्र सधैं सबारी
छ घाउ गैह्रो पुरियोस् तुरुन्त
हाम्रो यही नै शुभकामना छ ll २ ll

नाङ्गो भयो देश लुटेर सारा
र शेष भो केवल आँसु धारा
त्यो आँसु कैले नि नझर्नु पर्छ
हाम्रो यही नै शुभकामना छ ll ३ ll

कुभावले चित्त जलाउनेछ
गर्दा खुराफात रुवाउनेछ
फैलोस् सदाचार ढलोस् कुभाव
हाम्रो यही नै शुभकामना छ ll ४ ll

टुट्नेछ सम्वन्ध विखण्डबाट
सद्प्रेम मर्नेछ बढेर ढाँट
अखण्ड नेपाल रहोस् अखण्ड
हाम्रो यही नै शुभकामना छ ll ५ ll

रहोस् सबैसङ्ग पवित्र सोच
अकासियोस् मान र शान,ओज
चाँडै बनोस् शान्त समृद्ध देश
हाम्रो यही नै शुभकामना छ ll ६ ll

(छन्द :-उपजाति)
- सीता भट्ट / कोमल भट्ट
चन्द्रागिरी नगरपालिका,
वा.नं.२१-पुरानो नैकाप
काठमाडौँ
हाल:- न्युयोर्क

Naridarpan.com

कला साहित्य सुचना र संगीतमा समर्पण हामी सबैको नारीदर्पण डट कम सुचना तपाइको अधिकार । तपाइंको वरपरको खबर हामीलाई लेखी पठाउनुस - naridarpan81@gmail.com