गज़ल By, कोमल भट्ट


    पुरानै छ पूजा,धुपौरा पुरानै
    पुरानै छ भान्सा,कचौरा पुरानै

    भयो के र नौलो,प्रजातन्त्रबाट
    सधैँ पाक्न थाले,फुलौरा पुरानै

    बसे नित्य घेरेर नेतृत्वलाई
    पुरानै छ सारी,र दौरा पुरानै

    छ उस्तै सुरापान,उस्तै छ भोज
    बनेकै छ छोला भटौरा पुरानै

    भएको छ दुर्गन्धको रास ठूलो
    खुदै थुप्रॅदै छन्,कुसौरा पुरानै

    डसे दुर्दशाले,विरामी छ देश
    बढे फेरि काला घमौरा पुरानै

    चपाएर नेता बस्यो स्वाद मानी
    भयौं देशवासी,तितौरा पुरानै

    (भुजङ्गप्रयात छन्द )
    -कोमल भट्ट
    पुरानो नैकाप,काठमाडौँ
    हाल:-न्युयोर्क,अमेरिका

Naridarpan.com

कला साहित्य सुचना र संगीतमा समर्पण हामी सबैको नारीदर्पण डट कम सुचना तपाइको अधिकार । तपाइंको वरपरको खबर हामीलाई लेखी पठाउनुस - naridarpan81@gmail.com