गज़ल By, कोमल भट्ट


गज़ल By, कोमल भट्ट

जिन्दगीमा अझै के के,हुन बाँकी छ ?
कति रोएँ अरू कति ,रुन बाँकी छ ?

चकमन्न अँध्यारोले,निल्यो सधैँ नै
तारा झरे टिल्पिलाउँदो,जुन बाँकी छ

बैगुनीले भुली सके,टाढा सम्झिँदै
किन भन्थे फलानोको,गुन बाँकी छ ?

चाहनाका अग्ला महल,बले हुर्हुरी
खरानीको थुप्रो लाग्यो,छुन बाँकी छ

धर्म भन्दा पाप धेरै,गरे जस्तो भो
गंगाजलले अधर्म ती,धुन बाँकी छ

वेदनाले छाती भित्र,पोल्छ भतभती
विरहका पोका सबै,फुन बाँकी छ

रछ्यानमा मिर्किए झैं,भयो प्रतिभा
कस्ले सोच्छ खिया भित्र,सुन बाँकी छ ?

जननीलाई भुल्थेॅ कहाँ,फिर्छु अवश्य
तिर्नु पर्ने भारा तथा,नुन बाँकी छ

कोमल भट्ट
पुरानो नैकाप,काठमाडौँ
हाल:- न्युयोर्क,अमेरिका

Naridarpan.com

कला साहित्य सुचना र संगीतमा समर्पण हामी सबैको नारीदर्पण डट कम सुचना तपाइको अधिकार । तपाइंको वरपरको खबर हामीलाई लेखी पठाउनुस - naridarpan81@gmail.com