गज़ल By, कोमल भट्ट


गज़ल By, कोमल भट्ट
सुधाको घडा त्यो नप्यूॅदै जहर भो
खुसीको सहर यो व्यथाको सहर भो

रुँदै चाँद तारा लुके मेघ भित्र
अँध्यारो छ बस्ती र बस्नै कहर भो

ढले मित्रताका उँचा स्तम्भ ऐले
सके दैवको नै निकम्मा ठहर भो

नफुल्दै नफ़ल्दै सुक्यो जिन्दगानी
न टोकौं न बोकौँ वृथाको नहर भो

सयौँ वेदनामा बिते रात धेरै
यहाँ दर्द हर्ने न कौनै प्रहर भो

विलाए कता सिर्जनाका मुहान
न ता छन्द आयो न मीठो बहर भो

गए टाक्सिॅदै चाहना भित्रभित्र
सुखाशा सबै आज थोत्रो रहर भो

झरे आश उत्साह ती कोपिलामै
र साँच्चै निराशाहरूको लहर भो

(भुजङ्गप्रयात छन्द)
-कोमल भट्ट
पुरानो नैकाप,काठमाडौँ
हाल:- न्युयोर्क,युएसए

Naridarpan.com

कला साहित्य सुचना र संगीतमा समर्पण हामी सबैको नारीदर्पण डट कम सुचना तपाइको अधिकार । तपाइंको वरपरको खबर हामीलाई लेखी पठाउनुस - naridarpan81@gmail.com